ಭದ್ರಾಪುರ ಗ್ರಾಮದಲ್ಲಿ ಸಡಗರದ ಬಕ್ರೀದ್ ಆಚರಣೆ: ಮೈನುದ್ದೀನ್ ದಖನಿ ಸ್ಮರಣೆ!

POWER CITY NEWS:ಹುಬ್ಬಳ್ಳಿ /ಹುಬ್ಬಳ್ಳಿ/ಅಣ್ಣಿಗೇರಿ: ತ್ಯಾಗ ಮತ್ತು ಬಲಿದಾನಗಳ ಸಂಕೇತವಾದ ಪವಿತ್ರ ಬಕ್ರೀದ್ (ಈದ್-ಉಲ್-ಅದ್ಹಾ) ಹಬ್ಬವನ್ನು ಅಣ್ಣಿಗೇರಿ ತಾಲೂಕಿನ ಭದ್ರಾಪುರ ಗ್ರಾಮದಲ್ಲಿ ಮುಸ್ಲಿಂ ಬಾಂಧವರು ಸಡಗರ-ಸಂಭ್ರಮ ಹಾಗೂ ಸೌಹಾರ್ದತೆಯಿಂದ ಆಚರಿಸಿದರು.
​ಗ್ರಾಮದ ಈದ್ಗಾ ಮೈದಾನದಲ್ಲಿ ಸೇರಿದ ಮುಸ್ಲಿಂ ಬಾಂಧವರು ಇಸ್ಲಾಂ ಧರ್ಮಗುರುಗಳ ನೇತೃತ್ವದಲ್ಲಿ ಸಾಮೂಹಿಕ ನಮಾಜ್ ಹಾಗೂ ವಿಶೇಷ ಪ್ರಾರ್ಥನೆ ಸಲ್ಲಿಸಿದರು.
​ಮಾನವ ಧರ್ಮಕ್ಕೆ ವಿರುದ್ಧವಾದ ನಡವಳಿಕೆ ತ್ಯಜಿಸಿ: ಧರ್ಮಗುರುಗಳ ಕರೆ:
ಪ್ರಾರ್ಥನೆಯ ನಂತರ ಹಬ್ಬದ ಸಂದೇಶ ನೀಡಿದ ಧರ್ಮಗುರುಗಳು,”ಬಕ್ರೀದ್ ಕೇವಲ ಒಂದು ಧಾರ್ಮಿಕ ಆಚರಣೆಯಲ್ಲ. ಅದು ಸಮಾಜದಲ್ಲಿ ನಡೆಯುವ ಅನೇಕ ಅನ್ಯಾಯ, ಹಿಂಸೆಗಳಂತಹ ಮಾನವ ಧರ್ಮಕ್ಕೆ ವಿರುದ್ಧವಾದ ಕೆಟ್ಟ ನಡವಳಿಕೆಗಳನ್ನು ತ್ಯಾಗ ಮಾಡುವುದನ್ನು ಕಲಿಸಿಕೊಡುತ್ತದೆ. ಇಂದಿನ ಯುವ ಪೀಳಿಗೆಯು ದುಷ್ಟ ಶಕ್ತಿ ಹಾಗೂ ದುಶ್ಚಟಗಳಿಂದ ದೂರವಿರಬೇಕು. ಸಮಾಜದಲ್ಲಿ ಎಲ್ಲರೊಂದಿಗೆ ಶಾಂತಿ, ಸಮಾಧಾನ ಹಾಗೂ ಸೌಹಾರ್ದತೆಯಿಂದ ಬದುಕಬೇಕು” ಎಂದು ಅಮೂಲ್ಯ ಸಲಹೆ ನೀಡಿದರು.

​ ದಿವಂಗತ ಮೈನುದ್ದೀನ್ ದಖನಿ ಅವರಿಗೆ ಭಾವಪೂರ್ಣ ಶ್ರದ್ಧಾಂಜಲಿ!
​ಇದೇ ಸಂದರ್ಭದಲ್ಲಿ ಭದ್ರಾಪುರ ಗ್ರಾಮದ ಇಸ್ಲಾಂ ಧರ್ಮ ಬೋಧಕರು ಹಾಗೂ ಹಿರಿಯರಾಗಿದ್ದ ಮೈನುದ್ದೀನ್ ದಖನಿ ಅವರು ಕಳೆದ ಕೆಲವು ದಿನಗಳ ಹಿಂದಷ್ಟೇ ನಿಧನರಾಗಿದ್ದನ್ನು ಗ್ರಾಮಸ್ಥರು ಅತ್ಯಂತ ಭಾವುಕರಾಗಿ ಸ್ಮರಿಸಿದರು. ನಮಾಜ್ ಬಳಿಕ ನಡೆದ ವಿಶೇಷ ದುಆದಲ್ಲಿ ಮೃತರ ಆತ್ಮಕ್ಕೆ ಚಿರಶಾಂತಿ ಸಿಗಲಿ ಎಂದು ಕೋರಿ ಇಡೀ ಗ್ರಾಮಸ್ಥರು ಒಟ್ಟಾಗಿ ಪ್ರಾರ್ಥನೆ ಸಲ್ಲಿಸಿದರು.
​ ಹಿರಿಯರ ಉಪಸ್ಥಿತಿ
​ಈ ಸೌಹಾರ್ದಯುತ ಹಬ್ಬದ ಆಚರಣೆಯಲ್ಲಿ ಗ್ರಾಮದ ಹಿರಿಯರಾದ ಮಲ್ಲಿಕಸಾಬ್ ಚಿನ್ನೂರ, ಅಂಜುಮನ್ ಅಧ್ಯಕ್ಷರಾದ ರಮಜಾನ್ ಅಬ್ಬಿಗೇರಿ ಬಾಷಾಸಾಬ್, ರಾಯಸಾಬ್, ಶಬ್ಬೀರ್ ನಾಯ್ಕರ್, ಇಸಾಕ್ ದಖನಿ, ಖಾಜೆಸಾಬ್ ಚಿನ್ನೂರ, ಮೌಲಾಲಿ ನಾಯ್ಕರ್ ಸೇರಿದಂತೆ ಗ್ರಾಮದ ನೂರಾರು ಮುಸ್ಲಿಂ ಬಾಂಧವರು ಹಾಗೂ ಹಿರಿಯರು ಉಪಸ್ಥಿತರಿದ್ದು, ಪರಸ್ಪರ ಹಬ್ಬದ ಶುಭಾಶಯಗಳನ್ನು ವಿನಿಮಯ ಮಾಡಿಕೊಂಡರು.