ಖಾಕಿ ಪಡೆಗೆ ಸವಾಲು ಹಾಕಿತೇ!..ಕಳ್ಳರ ಕೈ ಚಳಕ! ಶೆಟ್ಟಿ ಮನೆಯಲ್ಲಿ 56ಲಕ್ಷಕ್ಕೂ ಹೆಚ್ಚಿನ ಸ್ವತ್ತುಕಳುವು!

power citynews:hubballi/ಹುಬ್ಬಳ್ಳಿ:* ನಗರದ ಕೇಶ್ವಾಪುರ ಪೊಲೀಸ್ ಠಾಣೆಯ ಕೂಗಳತೆಯ ದೂರದಲ್ಲೇ ಭಾರಿ ಪ್ರಮಾಣದ ಮನೆಗಳ್ಳತನ ನಡೆದಿದ್ದು,ಹುಬ್ಬಳ್ಳಿಯ ಪ್ರತಿಷ್ಠಿತ ಹೋಟೆಲ್ ಉದ್ಯಮಿಯೊಬ್ಬರ ಮನೆಯಿಂದ ಬರೋಬ್ಬರಿ, 50 ಲಕ್ಷ ರೂಪಾಯಿ ಮೌಲ್ಯದ ಚಿನ್ನಾಭರಣ ಹಾಗೂ 6.ಲಕ್ಷ ರೂಪಾಯಿ ನಗದು ಹಣವನ್ನು ಖದೀಮರು ದೋಚಿ ಪರಾರಿಯಾಗಿದ್ದಾರೆ.
ಖಾಕಿ ಕಾವಲಿನ ಸನಿಹದಲ್ಲೇ ನಡೆದಿರುವ ಈ ಹೈ-ಪ್ರೊಫೈಲ್ ಕಳ್ಳತನ ಹುಬ್ಬಳ್ಳಿ ಜನತೆಯನ್ನು ಬೆಚ್ಚಿಬೀಳಿಸಿದೆ.

ಮಗಳ ಕಾಲೇಜು ದಾಖಲಾತಿಗೆ ಹೋಗಿದ್ದ ಕುಟುಂಬ!
ಹುಬ್ಬಳ್ಳಿಯ ಕೇಶ್ವಾಪುರ ಪೊಲೀಸ್ ಠಾಣೆ ಸಮೀಪದಲ್ಲೇ ಇರುವ ನವೀನ್ ಪಾರ್ಕ್ ನಿವಾಸಿ, ಪ್ರಸಿದ್ಧ ಹೋಟೆಲ್ ಉದ್ಯಮಿ ಬಾಲಕೃಷ್ಣ ಶೆಟ್ಟಿ ಅವರ ಮನೆಯಲ್ಲಿ ಈ ಕಳ್ಳತನ ನಡೆದಿದೆ. ಬಾಲಕೃಷ್ಣ ಶೆಟ್ಟಿ ಅವರು ತಮ್ಮ ಮಗಳ ಕಾಲೇಜು ಉನ್ನತ ಶಿಕ್ಷಣದ ದಾಖಲಾತಿ (Admission) ಪ್ರಕ್ರಿಯೆಗಾಗಿ ಇಡೀ ಕುಟುಂಬದೊಂದಿಗೆ ಎರಡು ದಿನಗಳ ಹಿಂದೆಯಷ್ಟೇ ಬೆಂಗಳೂರಿಗೆ ತೆರಳಿದ್ದರು. ಮಗಳ ಮುಂದಿನ ವಿದ್ಯಾಭ್ಯಾಸಕ್ಕಾಗಿ ಮನೆಯಲ್ಲಿಯೇ 6 ಲಕ್ಷ ರೂಪಾಯಿ ನಗದು ಹಾಗೂ ಸುಮಾರು 50.ಲಕ್ಷ ಮೌಲ್ಯದ ಬಂಗಾರವನ್ನು ಇರಿಸಲಾಗಿತ್ತು ಎನ್ನಲಾಗಿದೆ.

ಪಕ್ಕಾ ಸ್ಕೆಚ್ ಹಾಕಿ ಕೃತ್ಯವೆಸಗಿದ ಖದೀಮರು!

ಬಾಲಕೃಷ್ಣ ಶೆಟ್ಟಿ ಅವರ ಕುಟುಂಬ ಬೆಂಗಳೂರಿಗೆ ಹೋಗಿರುವುದನ್ನು ಮತ್ತು ಮನೆಯಲ್ಲಿ ಯಾರೂ ಇಲ್ಲದ್ದನ್ನು ಪಕ್ಕಾ ಗಮನ ಹರಿಸಿದ್ದ ಕಳ್ಳರು, ನಡುರಾತ್ರಿ ಸಂಚು ರೂಪಿಸಿ ಕನ್ನ ಹಾಕಿದ್ದಾರೆ. ಮನೆಯ ಮುಂಭಾಗದ ಬೀಗ ಮುರಿದು ಒಳನುಗ್ಗಿದ ಖದೀಮರು, ಅಲ್ಮೇರಾದಲ್ಲಿದ್ದ ನಗದು ಹಣ ಹಾಗೂ ಇಡೀ ಚಿನ್ನಾಭರಣಗಳನ್ನು ದೋಚಿಕೊಂಡು ಸುಲಭವಾಗಿ ಪರಾರಿಯಾಗಿದ್ದಾರೆ.

ಪೊಲೀಸರಿಗೆ ಸವಾಲಾದ ಕಳ್ಳತನ!

ಅತ್ಯಂತ ಆತಂಕಕಾರಿ ವಿಷಯವೆಂದರೆ, ಈ ಕಳ್ಳತನ ನಡೆದಿರುವ ನವೀನ್ ಪಾರ್ಕ್ ಬಡಾವಣೆ ಕೇಶ್ವಾಪುರ ಪೊಲೀಸ್ ಠಾಣೆಗೆ ಅತ್ಯಂತ ಹತ್ತಿರದಲ್ಲಿದೆ. ಪೊಲೀಸ್ ಕಾವಲು ಇರುವ ಜಾಗದಲ್ಲೇ ಕಳ್ಳರು ಇಷ್ಟೊಂದು ಧೈರ್ಯದಿಂದ ಲಕ್ಷಾಂತರ ರೂಪಾಯಿ ಲೂಟಿ ಮಾಡಿರುವುದು ಸಾರ್ವಜನಿಕರಲ್ಲಿ ರಕ್ಷಣೆಯ ಬಗ್ಗೆ ಆತಂಕ ಮೂಡಿಸಿದ್ದು, ಕೇಶ್ವಾಪುರ ಪೊಲೀಸರಿಗೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ.
ಸ್ಥಳಕ್ಕೆ ಶ್ವಾನದಳ, ಬೆರಳಚ್ಚು ತಜ್ಞರ ಭೇಟಿ!

ವಿಷಯ ತಿಳಿಯುತ್ತಿದ್ದಂತೆ ಕೇಶ್ವಾಪುರ ಠಾಣೆಯ ಪೊಲೀಸರು ಸ್ಥಳಕ್ಕೆ ಧಾವಿಸಿ ಪರಿಶೀಲನೆ ನಡೆಸಿದ್ದಾರೆ. ಇನ್ನು ಘಟನಾ ಸ್ಥಳಕ್ಕೆ ಶ್ವಾನದಳ ಹಾಗೂ ಬೆರಳಚ್ಚು ತಜ್ಞರನ್ನು ( Fingerprint experts ) ಕರೆಯಿಸಲಾಗಿದ್ದು, ಕಳ್ಳರ ಸುಳಿವಿಗಾಗಿ ಮಹತ್ವದ ಸಾಕ್ಷ್ಯಗಳನ್ನು ಕಲೆಹಾಕಲಾಗುತ್ತಿದೆ.
ಸದ್ಯಕ್ಕೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ನವೀನ್ ಪಾರ್ಕ್ ಮತ್ತು ಸುತ್ತಮುತ್ತಲಿನ ರಸ್ತೆಗಳಲ್ಲಿರುವ ಸಿಸಿಟಿವಿ (CCTV) ಕ್ಯಾಮೆರಾಗಳ ದೃಶ್ಯಾವಳಿಗಳನ್ನು ಜಾಲಾಡುತ್ತಿದ್ದಾರೆ. ಮಗಳ ವಿದ್ಯಾಭ್ಯಾಸಕ್ಕಾಗಿ ಕೂಡಿಟ್ಟಿದ್ದ ಹಣ, ಒಡವೆ ಕಳೆದುಕೊಂಡ ಶೆಟ್ಟಿ ಕುಟುಂಬ ಸದ್ಯ ತೀವ್ರ ಆಘಾತದಲ್ಲಿದೆ.

hubballi